كيف ترفعين ضغط دم الولد..........للبنات فقط

بتفكرى تمضى استماره 6 لواحد بتحبيه ..... بسيطه اوى
لقيتى حبيبك بيقول " يمين " ..قوليله " شمال " ..
حيتخنق ويطفش .. دى ابسط حاجه

ألو حياتى وحشانى Happy valentine .. باى باى عشان بابا قاعد
وتقفلى الخط أوف أعمل ايه معاه خلاص مش طيقاه ولا طايقة كل كلامه الحلو.

أقولك انا ايه الحل وازاى تخلى ولد يكرهك فى كام خطوة ..
أبسط من البساطة..

لو كان ولد بينك وبينه علاقة حب ملتهبة
لكنك اتخنقتى منه وزهقتى !!!!!!!
هنا العملية سهلة جدا بصى يا سيتى حاجات بسيطه جدا و هيطفش

وانتو خارجين مع بعض
هزرى مع سواق التاكسى ... صاحبنا حيفور زى الميه عند مية درجه ... أفورى فى الهزار علي قد ما تقدرى .. واضحكى بصوت عالى فى الشارع ..

واذا عدى جمبيكم مجموعة شباب علقى عليهم.. (البادى اللى لابسه الولد ده حلو أوى) ... وياريت صاحبنا يسمعك .. احرجيه ... اكيد حيبصلك بغل ونرفزه .. بصيله وابتسمي اوى ... وياريت تبينى سنانك ... بس لو كان صاحبنا نرفوزه وعصبي ... بلاش الضحكه ديه ... عشان انتوا لو مشيين في البحر حتلاقي نفسك بتعومى حت مع السمك ... ياما صرخه هادره في وجهك الباسم ده اللى حيتنطط من الخضه ..

حاولى تعارضى كل أفكاره
لو كان من أنصار الاتجاه المحافظ ابنيله أفكار متحررة
.. ولو أفكاره متحررة ابنيله أفكار متشددة
ممنوع تمسك ايدى وحرام تكلمنى فى التليفون.

انما لو كان ولد انتى مش عارفاه يعنى عريس صالونات أهلك اتفقوا معاكى انك تروحى فرح بنت عمة خالة جدة باباه عشان تقابليه هناك ومش قادرة ترفضى كده فى المطلق.. دى فرصتك يامعلمة تكرهيه فيكى من البداية وييجى الرفض منه ..
روحى الفرح.. هزرى واضحكى مع كل الناس.. وارقصى فى وسط الفرح شدى المايك من المغنى وهو بيغنى أغنية ( شبرا وبنات شبرا.. سبتية والحلمية .. حاسب ياعم حاسب يا اخويا ) ومع الاداء .. حيبقي الموضوع مسخره .. وابقي قابلينى لو بص في خلقتك تانى ..

بس في ملحوظه :..
( اعملى حسابك ان ممكن أهلك هايتبروا منك )

بصي بقي لما يجي يكلمك علي الموبايل .. كأنك شغالة فى موقف اتوبيس او في قهوه بلدى.. ( ازيك يامعلم ايه الاخبار يا مان ) كده يعنى .. وافتكرى تلبسي لبس ولادى شويه .. فانكى يعنى ..

بعد التركيبة ديه .. الصياعة واللبس والكلام أكيد صاحبنا هايطفش .. لكن لو كان أهبل وعجبه كل تصرفاتك فى أول فرصة للكلام معاه قولى له ( بص بقي يا عم الحج انت .. انا ولا بعرف اطبخ ولا بعرف اكنس ولا امسح ولا حتى اضحك ... انا بنت كئيبه ونكديه .. اه انا بقولك اهه .. عشان نبقي علي نور ) وحاولى تقولي الجمله دى بقرف كده .. كانك حترجعى في وشه ..

ولاحظى انطباعه.............

لاحظتى انه اتمسك بيكى أكثر .. مش مهم احنا ميهمناش اى حاجه ..... اصله حيغور يعنى حيغور

ننتقل للخطة الثانية ..

لما يعزمك علي الغدا بره روحى متقوليلهوش لا .... اطلبى أغلى أكل وكمان بكميات كبيرة.. وبالطريقه دى هايعرف انك مسرفة .. ولما يجي الاكل .. كلى بهطل واعملى بالونات ببقك علي قد متقدرى .. كده حيعرف انك مفجوعه مفجوعة .. واتكلمى كمان والاكل في بقك وبصوت عالى .. احكي في اى موضوع .. كده انتى بالصلاه علي النبي فضحتيه .. الناس كلها حتبص عليكوا .. وحتضحك اومال حتعمل ايه .. خلى الناس تدفع الفاتوره مش علي الاكل ... لالالالا .. علي المسرحيه اللى شايفنها قدامهم .. غير كده الفاتوره حتبقي ملفته للنظر والدم حيبقي للركب .. الفاتوره حتبقي ورقه طويله .. من ايد المتر لغايه رجله .. ( الحساب يا فندم )
صاحبنا حيبلم ويدعى عليكي في سره .. وحيقول الجمله المشهوره اللى كلنا عارفنها .. (حسبي الله ونعم الوكيل )

ولو الحكاية دى مجبتش نتيجة
ننتقل للخطة البديلة وهى انك تركزى نظرك مع أى ولد يعدى جمبك حتى لو كان شكله يقطع الخلف والخميره من البيض .. وقولى باعجاب أوه.. واو .. ياه الولد ده يجنن ياعينى على حظنا الهباب .. بصوت عالى بس بحيث صاحبنا يسمع ويتكسف علي دم اهله .. وبحيث ان الواد اللى معدى ينبسط .. بنت عكسته .. حيتغر في نفسه وحيعمل حاجه من الاتنين
1_ياما حيعكسك وطبعا انتى ساعتها تكركرى من الضحك
2_ياما حيبص لصاحبنا من فوق لتحت واحتمال يتف عليه وهو ماشي
وفي الحالتين صاحبنا حيجيله شلل الرعاش

دلوقتى أقدر أقولك انك اتكرهتى بالثلث وكل خططك نجحت مبروك اتكرهتى يامعلمة.
اللهم بلغت اللهم فاشهد

ملحوظه
( لا انصح بعمل هذه الخطط مع البنات فوق التلاتين سنه )
حتعنسي اصلك

كنتم مع
ياسمين

ههههههههههههههههه ايه ياياسمين ده دى خطط منيله حرام عليكى
ده اللى حتعملها حتتفضح
بس بجد تموت من الضحك الخطط ديه

ليه كده بس
ده احنا فى رمضان
فعلا "ان كيدكهن عظيم"

هههههههههه شكرا بوسى وادمن على مروركم معلش بقى يا بوسى هى تفضح اه بس حلوة صح ولا مش صح اه فعلا ان كيدهن عظيم بقى كل ده علشان موضوع امال لو جبت واحد تانى بقى هتعملوا فيا هتطردونى ههههههههه ميرسى لمروركم تانى